ក្រសួងមហាផ្ទៃ៖ សេចក្តីប្រកាសព័ត៌មានស្តីពីលទ្ធផលប្រតិបត្តិការស៊ើបអង្កេតករណីឃាតកម្មលើនិស្សិតកូរ៉េខាងត្បូង
នៅថ្ងៃទី១៣ ខែតុលា ឆ្នាំ២០២៥ ក្រសួងមហាផ្ទៃ បានចេញផ្សាយសេចក្តីប្រកាសព័ត៌មានលម្អិតអំពីលទ្ធផលប្រតិបត្តិការស៊ើបអង្កេតករណីឃាតកម្មលើលោក Park Minho ជានិស្សិតកូរ៉េខាងត្បូង អាយុ ២២ឆ្នាំ។ សពរបស់ជនរងគ្រោះត្រូវបានប្រទះឃើញនៅក្នុងរថយន្តដឹកសពមួយគ្រឿងក្នុងក្រុងកំពត កាលពីថ្ងៃទី៨ ខែសីហា ឆ្នាំ២០២៥ ដែលនាំឲ្យមានការឃាត់ខ្លួនជាបន្ទាន់នូវជនជាតិចិនពីរនាក់ដែលជាអ្នកដឹកសព ខណៈជនសង្ស័យម្នាក់ទៀតបានរត់គេចខ្លួន។
ការធ្វើកោសល្យវិច័យបឋមបានកំណត់ថា មូលហេតុនៃការស្លាប់គឺបណ្តាលមកពីគាំងបេះដូង ដែលបង្កឡើងដោយការធ្វើទារុណកម្ម ជាក់ស្តែងមានស្នាមជាំជាច្រើនកន្លែងលើរាងកាយ។ ក្រសួងបានបញ្ជាក់យ៉ាងច្បាស់ថា ទាំងក្រុមគ្រួសារសព និងទាំងស្ថានទូតកូរ៉េខាងត្បូង ពុំបានទាក់ទងមកនគរបាលកម្ពុជាអំពីករណីនេះមុនពេលរកឃើញសពនោះទេ ដែលផ្ទុយពីការចុះផ្សាយរបស់សារព័ត៌មាន South China Morning Post។
ប្រតិបត្តិការស៊ើបអង្កេតបន្តបន្ទាប់ បានដឹកនាំកម្លាំងនគរបាលឲ្យចុះឆែកឆេរផ្ទះវីឡាមួយកន្លែងដែលជាទីកន្លែងស្នាក់នៅចុងក្រោយរបស់ជនរងគ្រោះ និងជាទីតាំងសង្ស័យមានសកម្មភាពអនឡាញខុសច្បាប់ ហើយបានឃាត់ខ្លួនអ្នកគ្រប់គ្រងអគារជនជាតិចិនម្នាក់ទៀត។ នគរបាលយុត្តិធម៌បានកសាងសំណុំរឿងយ៉ាងមូលសម្រាប់អយ្យការអមសាលាដំបូងខេត្តកំពត ដោយចោទប្រកាន់ជនសង្ស័យដែលត្រូវបានឃុំខ្លួនទាំងបីនាក់ (រួមទាំងបក្ខពួកពីរនាក់ទៀតដែលកំពុងគេចខ្លួន) ពីបទ ឃាតកម្មដោយអំពើឃោរឃៅ និងបទឆបោក (cyberscam) ក្រោមមាត្រា ២០៥, ៣៧៧, និង ៣៧៨ នៃក្រមព្រហ្មទណ្ឌ។ ជនសង្ស័យទាំងបីនាក់ត្រូវបានឃុំខ្លួនជាបណ្តោះអាសន្ន ចំណែកការស្វែងរកចាប់ខ្លួនបក្ខពួកពីរនាក់ដែលនៅសេសសល់កំពុងបន្ត។
ក្រសួងមហាផ្ទៃក៏កំពុងរៀបចំលិខិតផ្លូវការភ្ជាប់ជាមួយឯកសារពាក់ព័ន្ធដើម្បីជម្រាបជូនស្ថានទូតសាធារណរដ្ឋកូរ៉េប្រចាំកម្ពុជាផងដែរ។ អ្នកនាំពាក្យក្រសួងមហាផ្ទៃបានគូសបញ្ជាក់អំពីការប្តេជ្ញាចិត្តរបស់រាជរដ្ឋាភិបាលក្នុងការប្រយុទ្ធប្រឆាំងនឹងបទល្មើសឆ្លងដែនគ្រប់ប្រភេទ ជាពិសេសការឆបោកតាមប្រព័ន្ធបច្ចេកវិទ្យា ដែលទាមទារឲ្យមានកិច្ចសហប្រតិបត្តិការជាសកល។
ក្រសួងមហាផ្ទៃ
